«Белая Сова» фестиваліне 10 жыл: мәдени мұра мен шығармашылық мерекесі

Достық үйі – Қоғамдық келісім орталығында дәстүрлі «Белая Сова» фестивалінің 10 жылдық мерейтойы салтанатты түрде аталып өтті. Бұл фестиваль он жыл бойы әртүрлі этностардың мәдениетін дәріптеп, ұлттық өнер мен дәстүрлерді насихаттап келеді.

«Белая Сова» алғаш рет 2014 жылы ұйымдастырылды. Осы уақыттан бері ол аймақтағы этномәдени бірлестіктердің шығармашылығын біріктіріп, халықтардың мәдени мұрасын сақтап, болашақ ұрпаққа жеткізуге бағытталған.

10 жылдық мерейтойға орай шараға аймақтың танымал өнер ұжымдары мен этномәдени бірлестіктердің өкілдері қатысты. Олар ұлттық әндер мен билер орындап, қолданбалы өнер туындыларын ұсынды. Келген қонақтарға ерекше мерекелік көңіл-күй сыйлау үшін ұйымдастырушылар лотерея өткізіп, сыйлықтар таратты. Балалар үшін арнайы ойын-сауық бағдарламалары ұйымдастырылып, олардың көңілін көтеруге ерекше көңіл бөлінді.

«Белая Сова» фестивалі – халықтарды жақындастыратын, мәдениеттің сан алуандығын көрсететін маңызды шара болып қала бермек. Он жыл бойы біз бірлігімізді нығайту жолында жұмыс істеп келеміз және бұл шараның маңызы зор», - деп өз ойымен бөлісті қатысушылардың бірі.